خالد الصاوي لـ"أنا والقناع": الفن حياتي وكنت خايف بعد العملية ماقفش على رجلي في التمثيل تاني ولو دخلت صراع على حق مستحيل أطلع خسران.. ويؤكد: أنا ممثل محترف وصرفت دم قلبي عشان أكتب مسرحيات وأخرجها

أكد الفنان خالد الصاوي، أنه حينما أصيب بالانزلاق الغضروفى فى عام 2013 كان له بوادر قبلها بعامين وكان يتحمل الألم ويتعامل مع المرض بجنون، قائلا: "كنت بقعد أقول لنفسى أنى معجزتش وكانت نظرية غريبة لو جالى وجع اتحداه ولما تعبنى قوى عملت عملية".

وأضاف خالد الصاوى، خلال حواره ببرنامج "انا والقناع"، المذاع على قناة الحياة، أنه خاض عملية جميلة وناجحة وعاد لعمله وبعد 9 سنوات عاد التعب مجددا السنة اللى فاتت، ومن كتر ما أنا مضايق وقلت لو فتحت جراحة تانى فبقى الالم شديد وكنت بتحدى نفسى والوجع زاد لدرجة أنى كان هيغمى عليا".

واستكمل: "فكرة أنى هخش تانى واعمل عملية جراحية موصلتش للمرحلة دى وبقول لنفسى أنا ممثل لازم اشتغل على أيد ورجل وعين وأنا مزعج حتى للى بيعالجنى ورحت عملت علاج طبيعى ومش قادر استحمل".

وتابع: "فكرة أن السوق كله يعرف أنى فى حالة مش كويسة ممكن كنت أقعد فى اليت وبيجيلى الهاجس ده كده وممكن اقعد فى البيت وعندى كوابيس متكررة وأهم كابوس دلوقتى أنى اكون على خشبة المسرح ومش جاهز".

وأشار الفنان خالد الصاوى، إلى أنه يتنافس مع نفسه وليس مع الآخرين، موضحا أن من يلتفت إلى الآخرين ويتنافس لن يصل إلى هدفه أو الغاية التى يعمل من أجلها، موضحا أن التنافس مع الاخرين قد يضيع جزء كبير من طاقتك على لا شيء.

وشدد خالد الصاوى، خلال حواره مع الإعلامية منى عبد الوهاب، على قناة الحياة، على ضرورة أن يكون التنافس فى مهنتهم الفنية فى جو من التعاون، قائلا: "اشعر بالضيق إذا شاركت فى عمل وطلع مش حلو وقالوا لى أنت كنت كويس ببقى حزين لأنى فى النهاية منتسب للعمل". 

وتابع: "لو دخلت صراع مستحيل اطلع خسران إلا لو اتهزمت عندى حق.. وركزت وعندى خطة ودخلت معركة أنا اللى بديرها مش فرضت عليا وشخصيتى متعملهاش، واللى بيعمل صحبك وحبيبك ويبيعك فى موقف يعكس أنه مش حبيبك أو مغرور هو ده القناع اللى اسقطه".

وقال الفنان خالد الصاوى، إنه ممثل محترف ويحب الكتابة ولكن يرى أنه ممثل أولا ثم كاتب لحين ما يثبت ذلك بأنشطة وروايات، قائلا: "أنا بحب الفرشة والرغى ولما ابقى ساكت يبقى بفكر فى حاجة قلقانى أو حد فى القعدة عايز افهم اتجاهاته والتمثيل هو حياتي".

وأوضح الفنان خالد الصاوى، خلال حواره ببرنامج "أنا والقناع"، مع الاعلامية منى عبد الوهاب، على قناة الحياة، أنه كان يشعر فى بداياته أنه يحب التمثيل ولكن التمثيل لا يحبه، مضيفا: "مع الوقت بقت اكتشف وابص لنفسى بصة تانية والجمهور حبنى كممثل وصرفت دم قلبى عشان اكتب مسرحيات وأخرجها".

واستطرد: "كنت بخطط لنفسى فى العشرينات والثلاثينات ورجعت لورق كنت كتبه زمان وكنت محبط وقتها وببص فى التاريخ القى نفسى فى سن العشرينات ولم أتعرض لبلاوى وقتها وعقبات بجد وكان مشكلتى بسبب انى مش عارف اجيب فلوس من الفن اللى بحبه".