محمد صلاح مش هيمشي من ليفربول لأنه بيعمل تاريخ مش بيجري ورا الفلوس
رحيل محمد شريف وشادي حسين وحسام حسن قرار صحيح 100%
القندوسي ميستحقش يقعد في الأهلي.. وطاهر "حلو عليه لقب الدوبلير"
معلول "مالوش بديل" في أفريقيا مش في مصر بس
صفقات بيراميدز "رائعة" بس إللي أهم منها الجمهور
مع كل ميركاتو تطفو على السطح أزمة معاناة النادى الاهلى من غياب المهاجم الصريح، لاسيما أن الفريق الأحمر لم يجد ضالته فى نجوم كثيرين تعاقد معهم لحل هذه الأزمة، ولم يتركوا بصمة تذكر فى خط الهجوم الأهلاوى، بينما فشلت مساعيه فى ضم مهاجمين آخرين لأسباب مختلفة.
"اليوم السابع" التقى أحمد بلال، ماكينة الأهداف الحمراء وجلاد الحراس السابق، ليفتح قلبه ويكشف رؤيته لندرة المواهب الهجومية فى مصر، وكيف يحل الأهلى أزمة خط الهجوم، كاشفاً تقييمه لميركاتو القلعة الحمراء، سواء الصفقات الجديدة أو الراحلين، وإلى نص الحوار..
*هل تعانى الكرة المصرية من أزمة ندرة المواهب الهجومية؟
طبعا.. عندنا أزمة فى الناشئين.. المواهب مبقتش زى زمان، والأندية لجأت لتغيير طرق اللعب للتغلب على أزمة غياب المهاجم الصريح.
*مين أجمد مهاجم فى مصر؟
لو تقصدى داخل الدوري المصري مبقاش عندنا مهاجم رقم 9 زى أوروبا، بس بشوف سيف الجزيري مهاجم الزمالك ومابولولو مهاجم الاتحاد السكندري الأفضل، وعلى مستوى خارج مصر مصطفى محمد أجمد مهاجم فى الكرة المصرية.
*هل انتهت أزمتك مع مصطفى محمد؟
مفيش أزمة من الأساس .. الناس فسرت كلامى غلط.. قلت مصطفى محمد محتاج يطور حاجات فى أدائه، زى إنه يصنع لزملائه، وحقيقى هو استجاب وطور من نفسه كتير، لكن فى ناس قالت على لسانى إنى قولت إنه معندوش فكرة وده محصلش.
* مصطفى محمد يقدر يحل مشكلة الأهلى الهجومية فى رأيك؟
ليه لأ.. مهاجم كويس وقناص وبيلعب بدماغه كويس وبيلتحم بشكل قوى.. طبعا لو فيه فرصة أرشحه للانضمام للأهلى.
*شوفت إزاى قرار الأهلى برحيل محمد شريف؟
قرار مناسب وجه في وقته.. شريف مكنش المهاجم رقم 1 فى حسابات كولر واتعرض لضغوط كثيرة الموسم الماضى، ولو كان استمر في الموسم الجديد مكنش هيلعب، والأهلى استفاد بفلوس بيعه للخليج السعودى قبل نهاية عقده.
*وماذا عن قرار عودة صلاح محسن؟
لو استمر محمد شريف كنت سأرفض قرار عودة صلاح محسن لأنهم نفس الستايل في اللعب، بينما بعد رحيل شريف يصبح قرار عودة صلاح محسن مناسباً.
*الأهلى يفاوض سوزا.. هل تراه الأنسب لدعم هجوم الأهلى؟
مشفتوش خالص ومقدرش أحكم عليه.. لما ينضم ويلعب ونشوفه نقدر نقول هو المهاجم المناسب ولا لأ.
*ماهى الصفقة التي تنقص الأهلى؟
مهاجم صريح رقم 9 .
*وماذا عن بديل على معلول؟
على معلول مالوش بديل فى قارة أفريقيا كلها.
*هل تؤيد خروج القندوسى للإعارة؟
لم يترك بصمة تذكر وقرار إعارته موفق.
*وماذا عن قرار رحيل شادى حسين وحسام حسن؟
قرار سليم 100% .. أعتقد لن يكون لهم مكان مجدداً في الأهلى.
*هل تؤيد قرار الأهلى باستمرار طاهر محمد طاهر؟
قدم أداء متراجعاً الموسم الماضى.. وأعتقد لن يظهر فى التشكيل الأساسى بالموسم الجديد، وسيكون بديلاً جيداً فقط.
*هل تتوقع نجاح إمام عاشور مع الأهلى؟
لاعب كويس وعنده خبرات، ولازم يتعود على ضغوط الأهلى لأنها مختلفة عن الزمالك، ونجاحه متوقف على شخصيته.
*هل سيتأثر الأهلى برحيل حمدى فتحى؟
بحب اللاعب ده أوى، مقاتل وذكى ومتطور ومؤدب مسمعناش عنه مشكلة واحدة طول وجوده في الأهلى.. توقيت رحيله صعب بس الأهلى عنده لاعيبة كتير مميزة فى مركزه.
*شوفت إزاى قرار تعيين وليد سليمان رئيساً لقطاع الناشئين في الأهلى؟
الأهلى أسند الجانب الفني فى قطاع الناشئين للكابتن بدر رجب، وهو قرار موفق للغاية، نظراً للخبرات الكبيرة له فى هذا المنصب على مدار السنين، ومنح الجانب الإداري لوليد سليمان وهذا جانب يحتاج شخصية قوية وخبرات ووليد من كباتن الاهلى ووجوده أمر طبيعى.
*ومارأيك في قرار تعيين مؤمن زكريا نائباً له؟
من الحاجات اللى بحبها في الأهلى هذه القرارات.. مؤمن لاعب كبير وكان مؤثراً مع الأهلى، وهذا قرار معنوى يليق بالأهلى ويستحقه مؤمن زكريا.
*هل تؤيد قرار رحيل على لطفى عن الأهلى؟
خلينا نقول الإبقاء على محمد الشناوى قرار جيد، وكان لازم على لطفى يخرج في الوقت دا عشان يلحق يلعب، وعندنا جول واعد أثبت أحقيته فى الحصول على فرصة اسمه مصطفى شوبير.
*ما الفارق بين كولر وموسيمانى؟
كولر مدير فنى متطور يجيد قراءة المباريات وعارف إمكانيات فرقته كويس وبيعرف يستغلها، موسيمانى بيلعب بطريقة مباراة مباراة حاجة زى الكئوس كدا.
*هل تتوقع نجاح رضا سليم مع الأهلى؟
رضا سليم وينج وبيلعب فى نفس مكان بيرسى تاو..هل الأهلى بيفكر فى رحيل بيرسى تاو عشان كدا اتعاقد مع رضا سليم، ولا هيتم تغيير مكانه مش عارف الرؤية إيه حقيقى.
*بيراميدز دعم صفوفه جيداً.. هل تتوقع منافسة ساخنة مع الأهلى على الألقاب المحلية؟
بيراميدز عنده فرقة كويسة وعمل صفقات قوية، بس أرجع أقولك الأهلى عنده أهم حاجة، وهى جمهوره، عشان كدا هتفضل كفة الأهلى هى الأرجح.
*الأهلى يقدر يحافظ على لقبه الأفريقى فى رأيك؟
هيواجه صعوبة كبيرة وتحفز من كل المنافسين فى القارة بس كتيبة كولر تقدر تعملها.
*فين أحمد بلال من تولى المناصب داخل الأهلى؟
فى القناة.. موجود وكل حاجة، وحقيقى لا أسعى للمناصب.. القصة دى تقديرية للغاية.
*هل تتوقع رحيل محمد صلاح للدوري السعودى؟
لأ.. صلاح مش بتاع فلوس، ولو بيدور على فلوس مكنش جدد تعاقده مع ليفربول، صلاح بتاع التاريخ، صلاح قدوة للمصريين كلهم.
