قال الرئيس عبدالفتاح السيسي، لا شك أن الظروف صعبة صحيح، بس خلوا بالكم يعني بقالنا 4 سنين في ظروف صعبة جدا، سنتين منهم الدنيا كلها والعالم كله علشان موضوع كورونا واللى حصل، وسلاسل الإمداد تأثرت تأثرا كبيرا والعالم والاقتصاد كله توقف لكن إحنا متوقفناش علشان إحنا ورانا حلم كبير قوي شغالين فيه، وكنا نامل إن الأمور أحسن لكن جت أزمة تانية كبيرة وكان ليها تاثير كبير وحاولنا بظروفنا الاقتصادية الصعبة اللى بقول فيها لكم افتكروا كويس لما عملنا خطة الإصلاح الاقتصادي قلنا إذا نجحنا فيها ننطلق لآفاق أفضل كان معدل النمو متقدم وصلت الى 5.8 % وكنا نامل اكتر من كده".
وأضاف الرئيس السيسي خلال افتتاح عددا من المشروعات بمحافظة بنى سويف: "أزمة ما زالت مستمرة حتى الان "حرب أوكرانيا" ..احنا بنتكلم في كل سنة مش عاوز أقول ارقام لكن ممكن أقول رقم ممكن ننتبه ان احنا بنستورد كميات كبيرة من القمح والذرة وزيت الطعام وارتفاع اسعارهم كان ليهم تاثير كبير حاولنا كدولة ان الأسعار متنعكس بقوة على الناس وتمثل الثمن الحقيقى بتاعها".
تابع الرئيس: "بتكلم عن 10 مليون طن قمح لو الطن الواحد زاد 100 دولار احنا بنتكلم في ارقام كبيرة علشان نوفر عيش الخبز،.. بقول الكلام ده ليكم لما بقول ان انا منكم وحاسس بيكم".. "متنسوس ان أنا إنسان مصري بسيط عشت عمرى كله زيكم كده وربنا أراد أكون في المكان ده هو ربنا اللى أراد وبالتالي أن مش بعيد عنكم.
أكد الرئيس عبد الفتاح السيسي، أنه يقدر ظروف المواطنين، متابعا: "عاوز أقولكم أنا مش بعيد خالص عن الحال بتاع الناس.. مش بقول الكلام ليكم بس.. وبالمناسبة وأرجع أقول لما بقول إني حاسس ومنتبه.. طب انتوا فاكرين ان لو فيه فرصة أكثر من كده.. والله لو فرصة مش هنتأخر.. محدش بيجب حاجة من جيبه.. أيوه والله".
قال الرئيس عبد الفتاح السيسي، أنه يقدر موقف المصريين من التحديات والصعوبات، متابعا: "أنا عارف التحدي والصعوبات اللى بيعيش فيها الناس كلهم.. موقف المصريين مقدر أوى والله.. أنا بقولهم في جبر خاطر ليا أنا شخصيا.. أنا عارف ان الظروف صعبة وان الناس مستحملة وساكتة ده كتير.. إحنا مش سايبين حاجة نقر نعملها ومش بنعملها".
وأضاف الرئيس السيسي: "لما بقول الكلام ده.. مش هقول الإعلام يقول ولا.. بنبذل جهد كبير أوى لإدخال كميات من الأراضى الزراعية في أقرب فرصة".
قال الرئيس عبد الفتاح السيسي، إن الدولة تسعي إلى زيادة الأراضي الزراعية، متابعا: "بنتكلم عن 3 -4 ملايين فدان أراضي زراعية في سنتين تلاتة.. غير الريف المصري مليون ونصف فدان.. وشغالين على كده.. أراضي زراعية أخري لتوفير فرص عمل لشبابنا".
وأضاف الرئيس السيسي: "لما بنتكلم عن 3 ملايين فدان.. لو كل فدان هياخد نص فرد.. كل فدان بيوفر فرصة عمل لـ 2 مواطن.. مليون ونص إنسان.. نوفر لهم فرص عمل.. ثم أنه يكون فيه إنتاج من هذه الأراضي خفف من فاتورة الاستيراد.. بنستورد بالدولار.. لكن تباع بالجنيه طبعا.. لكن المطلوب أن الدولة توفر الدولة وتجيب الحاجة دي".
وتابع الرئيس السيسي: "الكلام ده لا ينطبق على المواد الغذائية بس ولكن كل المستلزمات بالعملة الحرة".
قال الرئيس عبد الفتاح السيسي، إن كل دولار يزيد في سعر برميل البترول تكلفته علينا بالمليارات سنويا، وموضوع الكهرباء وبمنتهى الصراحة عندنا محطات كهرباء تقدر تطلع الكهرباء التي نحتاجها وزيادة لكن عاملين موازنة اللى تقدر توفر الغاز كانت الموازنة 65 دولار للبرميل لكن لما يزيد ويبقى 70 و80 و90 إحنا بنقول إن الأزمة لها انعكاس على حاجات كثيرة.
وأضاف الرئيس السيسي: ومن فضل ربنا إننا بننتج غاز .. لولا ذلك لكانت المشكلة كبيرة جدا، ولما أكون عامل موازنة أن برميل البترول بـ65 لكن لما يبقى بـ80 ولا 90 ، عندنا في مصر 10 ملايين سيارة، ومطلوب أن كل مواطن يدخل المحطة يلاقى احتياجاته.
قال الرئيس عبد الفتاح السيسي: إحنا في مصر عددنا 110 ملايين وعندنا ضيوف 10 ملايين، وبفضل الله مستوعبينهم في مصر، وعلى المستوى الشخصى حاسس إن ربنا ساترها علينا.
وأضاف الرئيس السيسي: أرجو إنكم تقبلوا شرحى للظروف، واشكركم على الصبر، والتحمل وبقول يا رب يعيننا كلنا، إحنا مش بنعمل حاجة وحشة لمصر في كل قراراتها وسياساتها، إحنا مش بنؤذى حد، وبنحاول نكون عمل خير في كل حاجة وشكرا جزيلا".
