تحدثت الكاتبة الصحفية علا الشافعي رئيس تحرير "اليوم السابع"، ورئيس المحتوي الدرامي فى الشركة المتحدة للخدمات الإعلامية، عن الدراسة فى كلية الإعلام، قائلة: "أول سنة فى الكلية قعدت مع عمي فى مصر الجديدة، وبابا كان خايف عليا، وكان المشوار صعب جدا، وباقي السنوات أقمت فى المدينة الجامعية للطالبات، وكان عندى تحدى أن مش هدرس إعلام وهرجع البلد تاني علشان اشتغل مدرسة وكان ليا عمى الله يرحمه كان دايما يقولي لو خرجتى بشنطة هدومك مش هترجعى البلد".
وأضافت خلال حوارها فى برنامج "الوش التاني" الذي يقدمه الإعلامي أحمد شوبير على راديو أون سبورت FM 93.7: "عائلتي مدمنة للعمل ومش بيحبوا القعدة فى البيت.. وبدأت التدريب فى السنة الثانية من الكلية ومكنشي معايا واسطة.. وكان عندى فرصة للتدريب فى الأهرام والأخبار والأهرام كانت بالنسبة لى حلم وجت صدفة أن الكاتب الكبير الراحل أنيس منصور وشاف حماس الشباب فينا وقرر اختيار 5 طلاب للتدريب فى مجلة مايو.. واتدربت جوه مبني الأهرام وكان بالنسبة لى المشهد مهم واتكعلبت وأنا داخله الأهرام لأول مرة ودى تفصيله مش هنساها أبدا".
وتابعت الكاتبة الصحفية علا الشافعي: "وبعد ذلك تدربت فى مجلة الشباب بالأهرام ودى كانت فرصة مهمة وده فى السنة الثالثة للكلية وكنت بشارك فى صوت الجامعة وكان يوزع أمام الجامعة.. كنت بدرب فى الأهرام وفى نفس الوقت كنت بعمل شغل فى صوت الجامعة ولأول مرة قابلت الأستاذ إبراهيم حجازي وطلب مني التدريب للمرة الأولي فى الأهرام الرياضي وكان الكارت بتاعه 6 أرقام وبعد كده نقلت من مجلة الشباب للأهرام الرياضى، وكان معايا الدكتور ياسر أيوب، وكانت فرصة جميلة.. هى المجموعة اللي أسست الأهرام الرياضي، واتعلمت من ياسر أيوب وأفضل مدينة له بفضل واتخرجت من الجامعة.. وأنا فضلت جوه الأهرام وشاركت فى تأسيس مجلة علاء الدين للأطفال، وأخدت خبرة منها كبيرة، وبعد كده بدأ الأستاذ أسامة سرايا التجهيز للأهرام العربي.. أبويا أكثر رجل مؤثر فى حياتي وكان بيشجعني فى هذه الفترة وبدأت وقتها الدراسة فى معهد السينما، وبعد 7 سنوات فى الأهرام اتعينت وبعد كده عملت طلب نقل للأهرام العربى وكانت تجربة مختلفة أيضا، وبقيت مسئولة عن قسم الفن فى الأهرام العربى".
تم أضافة تعليقك سوف يظهر بعد المراجعة