نيبو وأرض الفراعنة.. سر التمثال المسحور فى المتحف المصرى

منصور وكرم ونيبو

وقف كرم ومنصور داخل إحدى قاعات المتحف المصرى بالتحرير
لكن نيبو كانت ثابتة لا تتحرك
عيناها مثبتتان على تمثال أسود داكن
كرم هامسًا:
هو ده التمثال المسحور؟
منصور اقترب ببطء:
أيوه
ده تمثال الكاهن المصرى القديم
دجد - حور
كرم:
كاهن؟
طب فين السحر؟
نيبو اقتربت أكثر
التمثال كان جالسًا فى وضع القرفصاء
وبين ذراعيه لوحة صغيرة
منصور:
بص كويس
كرم دقق النظر:
ده.. طفل واقف فوق تمساحين!
منصور:
ده حورس الطفل
واقف فوق تمساحين
رمز للخطر اللى بيستخبى فى صمت
زى التمساح تحت الميه
كرم:
يعنى التمساح خطر
وحورس هو اللى بيهزمه؟
منصور مبتسما:
بالظبط
منصور:
التمثال ده يرجع للعصر المتأخر
حوالى 323 - 317 قبل الميلاد
وعثر عليه سنة 1909 فى مدينة أتريب بالقليوبية
كرم:
طب ليه الناس بتقول عليه مسحور؟
منصور:
لأنه ما كانش مجرد تمثال
كان أداة علاج
كرم مندهشا:
علاج؟ إزاى يعنى؟
منصور:
كانوا يسكبوا ميه على التمثال
والميه تنزل على النقوش السحرية المحفورة عليه
الكهنة كانوا يؤمنوا إن الميه دى بتتشحن بطاقة روحية
والمريض يشربها
أو يغتسل بيها
خصوصًا لو اتلدغ من حية أو عقرب
كرم:
يعنى كان بيعالج لدغات الزواحف؟
منصور:
أيوه حسب اعتقاد المصرى القديم
وده نوع من تماثيل اسمها «ألواح حورس الطفل»
كلها مغطاة بتعاويذ هيروغليفية
نيبو جلست أمام التمثال بهدوء
وكأنها تحرسه
كرم:
طب التعاويذ دى كانت بتعمل إيه؟
منصور:
رموز قصد بها مخاطبة عالم آخر هو العالم النجمى
علشان كان فى نظر المصرى القديم هو عالم
متداخل مع عالمنا وليس منفصلا عنه
عالم نجمى اسمه «الدوات»
تذهب إليه الأرواح بعد الموت
وفيه أيضًا تكمن أسباب الأمراض
كرم ابتلع ريقه:
وكانوا الكهنة بيعملوا إيه كمان؟
منصور:
الكهنة كانوا على درجة عالية من العلم والثقافة
كانوا يعرفوا باسم «حريو تب»
يعنى متصدر الجميع
كرم:
يعنى التمثال مسحور فعلا؟
منصور:
ده انعكاس لفلسفة شفاء كاملة
عند المصرى القديم
صمت لحظة
نيبو رفعت رأسها فجأة
ونظرت نحو قاعة أخرى فى نهاية الممر
كرم:
نيبو رايحة فين تانى؟
منصور ابتسم:
واضح إننا مخلصناش
كرم:
فيه إيه تانى؟
منصور:
فيه قناع ذهبى مذهل
لملك عظيم
كرم بلهفة:
قناع ذهبى غير اللى حكيتلى عليه
بتاع الملك توت عنخ آمون؟
منصور:
قناع تانى
لملك عظيم تانى
نيبو بدأت تتحرك ببطء نحو القاعة الجديدة
كرم بصوت مليان حماس:
هو إحنا كل مرة بنكتشف سر أكبر؟
منصور:
وأكبر وأخطر أحيانًا
نيبو توقفت عند مدخل القاعة
والضوء انعكس على شىء يلمع فى الداخل
كرم همس:
ده.. ده دهب؟
منصور بصوت خافت:
المرة الجاية
هقولك..