مفطّراتى.. ماشى بآلاتى
ويّايا طبلة.. بانده يا أبلة
عنتر يفطّر حبيبته عبلة
ويّايا آلة.. ماشية بتكاله
شاعر يا خالة ومغنّواتى
مفطّراتى.. ماشى بآلاتى
بنقول له يا الله يا مأدّناتى
ادّن وكبّر.. الفول مشبّر
والبامية.. تسلم.. إيدين مراتى
هذا أوانى... ربّيت بناتى
لفّيت حوارى.. ساعة العصارى
ومشيت أغنّى فوق الكبارى:
.............
مدد يا سيّده زينب
فداك يا سيد القطبين
يا نور من ضهر عبدالله
مدد يا خِلفة الذبيحين
متيّم قلبى بترابك
وجاى تايب على بابك
وباتشفع بأحبابك
على وفاطمه و«حسن وحُسين»
.............
مدد يا بدر فى الإسراء
يا رافع راية التأميم
يا ضيّ بيتخلق فى حِراء
يا عِزّه ف قلب كل يتيم
مدد يا أعظم الأسماء
مدد يا غزوة التعليم
.............
ميلادك كان ميلاد العيد
ميلادك ثورة التجديد
ميلادك رمز للأحرار
وتنهيدة عبيد السِّيد
.............
ميلادك كان سلام نيّه وكان فرحة جناينيه
وكان كلمة سلام ع النار وكان للأرض حرّيه
.............
مدد يا فارس الأزمان
يا حلّ المسأله الصعبه
يا نور للجن والإنسان
مدد م الأقصى للكعبه
.............
ميلادك لحظه للتحنان
وترنيمه ووطن وأمان
وكلمه ف حضرة الجامع
وقلب بيعشق القرآن
.............
ميلادك كان ميلاد إحلال
لتجديد الخبر والحال
ميلادك كان ميلاد معنى
نزل... سجدت عشانه جبال
ميلادك رمز جمّعنا
ميلادك كان أدان لبلال
.............
مدد يا سيّد الملكوت
يا صوت فجّر هُبل ومناه
يا هادى يا صاحب الجبروت
يا ثوره ف ساعة المناجاه
تهون الروح ولو هنموت
يصير الموت مطر محاياه
مدد يا سيّد الملكوت
فداك يا خير خلق الله
