الشخص العصبى من الأشخاص اللى بيعانوا جدًا فى حياتهم، بيعرف يخسر الناس بسهولة وبدون ما يشعر بشىء من أفعاله، إللى هو يكون قاعد بيضحك معاك وبتهزورا مع بعض، فجأة يتنرفز عليك، ويقولك متهزرش معايا، ويغضب بس من الهزار.
فى مرحلة بيوصل ليها وهى إنه يفقد أعصابه من أقل صوت مثلًا، صوت طفل بيعيط، صوت شخص عالى، صوت نقط ميه، أو مزيكا، تدريجيًا بيبدأ يشعر بإنهيار داخلى وإنه عايز يكسر شىء، يضرب شخص، يشتم أو يخبط حاجة، أى طريقه يعبر بيها عن إللى جواه وإللى أغلبها إنه يزعق بصوت عالى فى أقرب شخص ليه.
الشخص العصبى تقلباته المزاجيه أسرع من أى شخص طبيعى بمراحل، ولكده بيوصله الشعور مضاعف فى التعب النفسى، بيكره البرود والأغبياء جدًا، اوقات بيدخل فى نوبات عصبية بتقعد معاه أيام، بيكون فيها كئيب منطوى على نفسه، مبيتكلمش مبياكلش مبيخرجش.
بيتطور فى التدهور العصبى بسرعة بسبب التفكير المستمر فى تحليل الأشياء إللى حواليه تحليل الكلام والأسئلة، ده يقصد أيه وده بصلى كده ليه، عقله بيكون بركان بيفور من كتر التفكير، وبيخليه شخص صعب التواصل معاه لسرعة غضبه وسوء ردود فعله.
أما الجانب الحلو فيه، إنه شخص جميل فيه كل تفاصيله، بيعرف يكون صاحب وحبيب وأخ كمان، مميزاته أكتر من عيبه، ولأسف عصبيته بتغطى على الحلو إللى فيه، ويبقى الشخص العصبى هو أطيب شخص على الكوكب تقدر تتعامل معاه وتدمن وجوده فى حياتك.
