أسهل شىء فى الدنيا أنك تكون شخصية عامة، ولك جمهور وتطلع تنتقد الحكومة والمسؤولين، وغلاء الأسعار مش عاجبك والصحة والتعليم وتزعق وتشير على صفحتك جمل نارية، وتتصور كام صورة مع الكادحين من الشعب وتبقى بطل وأهلك وأصحابك يبقوا فرحانين بيك وبيتصوروا معاك ومش مهم البلد.
أسهل حاجة إنك تقول أنا مسلم أو أنا مسيحى وبغير على دينى وإلا دينى، وكلنا فداء المسجد أو الكنيسة، وتبقى كذاب ومنافق وبتغش ولا تعرف عن تعاليم دينك حاجة.
أسهل حاجة إنك تطلع تقول «مصر هيا أمى» وتحط علم مصر فوق بيتك ومكتبك، وفى أعياد أكتوبر تنزل تهانى وتكتب كام كلمة سخنة وأنت بترشى ناس عشان تمشى شغلك ومابتدفعش الضرايب.
أسهل حاجة إنك تقعد تتريق على الوزراء والمسؤولين، وتعمل كوميكس على زيادة الأسعار وأنت متأكد من جواك وعارف إن ماعندناش حل تانى ولا هانقدر نكمل بحالنا الاقتصادى كده لكن لازم تاخد اللقطة وتبدأ تسخن الناس على الحكومة، وتقول حرام وكفاية والناس اتكوت من الأسعار، ولو أنت مش عارف أو مش فاهم كنا قولنا معلش لكن المصيبة إنك عارف وفاهم ليه الحكومة بتعمل كده.
الحقيقة يا سادة أن منا وفينا من ينافقون الشعب من أجل بريق النجومية الشعبية ومش مهم مصلحة البلد.
الحقيقة إن اللى إيده فى الميه مش زى اللى إيده فى النار.
الحقيقة أن أصعب شىء فى مصر الآن أن تصبح مسؤولًا فى الحكومة، زمان كان كله تمام وحتتين أرض للعيال بيصبروك على الانتقادات، لكن دلوقتى الوزير لازم يسيب مكتبه الخاص وعمله أو عمل عائلته ويحلف اليمين ويصحى من الصبح ويشتغل لبليل ويستحمل الرأى العام، ويستحمل البيروقراطية اللى بقالها سنين وياخد أربعين ألف جنيه ويسكت وما يتكلمش، ولما يجى يعمل أى فكرة للإصلاح يتحمل الشتيمة هو وأهله.
إيه الظلم ده!!!!!
نفاق كله نفاق، ننافق الشارع ننافق المواطنين.
نقول إن الشعب المصرى هو أعظم شعوب العالم وننسى أن منا الذى لا يعمل ولا يذهب إلى عمله ويتقاضى راتبه بضمير ميت.
نقول إننا نحب بلادنا وكل منا يحب نفسه أولًا ولا نحترم المرور ولا القوانين، ونطالب أن تصبح بلادنا مثل سويسرا!
طب ازاى؟ الدول تتقدم بشعوبها مش بحكوماتها.
إذًا يجب المصارحة، يجب أن نواجه أنفسنا، يجب أن يكف البعض عن الهرى الفاضى دون علم وتخصص.
إن إصلاح حال البلاد يأتى بالعمل والتضحية وليس بالشعارات والأعلام.
من يقيم الصلاة ليل نهار ليس بالضرورة أن يتقدم لكن من يعمل بإتقان وصدق لابد أن يتقدم.
مصارحة الشارع المصرى بعيوبه وبحال بلده الحقيقى هو أول الطريق كى نحقق إصلاحًا حقيقيًا.
مين السبب فى اللى بيحكموا البلد دلوقتى إن حال البلد تكون بهذا الشكل؟ مين اللى قال إن الرئيس السيسى أول ما حلف اليمين لقى الاحتياطى خمسين مليار دولار؟
ما احنا كل حاجة كانت قدام عنينا!!
طيب تعالوا انتوا يلى مش عاجبكم حاجة قولولنا حل؟
لا مافيش، ولا فكر ولا أداء ولا عمل!! أمال إيه؟ تريقة وتكسير معنويات والسلام، ومعالى النجم الشعبى راح ومعالى المشهور رجع.
زيادة الأسعار هى اللحظة اللى بيبان فيها الناس دى تمامًا، للأسف هما عارفين إن الدولة ماشية على خطة ليس لها بديل واضطرينا لها، وعارفين إنها جاية بكرة أو بعده، فتلاقيه صوته عالى وبيعمل فيها بطل مسبقًا عشان قال إيه لو حصلت الزيادة يبقى حذر الحكومة ووقف فى صالح المواطن.
هذا النوع من التزييف لابد أن يقاوم، ولابد أن ينكشف أمام الناس، من لا يقدم شيئًا لا يتكلم، من لا يعمل لا يطلب، من لديه حلول فليتقدم، ومن لديه أى كلام لمجرد الكلام ينقطنا بسكاته.
أرجو من الحكومة أن تظهر عدد حالات التعدى على الأراضى الزراعية، وعدد حالات الاستيلاء على أراضى الدولة، وعدد حالات سرقة التيار الكهربائى وسرقة قضبان حديد القطارات، وكم قضايا التهرب الضريبى، وعدد قضايا الرشوة.
ما بتبقوش مكسوفين من عدد القضايا اللى بتضبطها الرقابة الإدارية كل يوم؟
ما بتشوفش مكانة المسؤولين اللى مقبوض عليهم دلوقتى؟ ده اللى مسكناهم حتى الآن ما بالك باللى لسه مقضينها فساد.
ماسمعتش عن ناس مننا باعت بلدها لدول بتكرهنا وتقتل ولادنا، ماشوفتش ناس على مواقع التواصل الاجتماعى بتسب بأفظع الشتائم شخصيات سياسية كبيرة فى بلدنا.
مين دول؟ شعب الدنمارك الشقيق!
دول احنا ومننا وفينا واحنا عارفين كده وبنتغاضى عن الكلام ده ونمسك فى الكام وزير اللى قاعدين كام سنة وماشيين، ونقول إن هما سبب كل مشاكلنا.
لا يا اخونا احنا كده بنضيع وبنضيع البلد ورانا.
استقيموا يرحمكم الله.
تم أضافة تعليقك سوف يظهر بعد المراجعة