كتير..
كتير قوى
الفرحة جوّانا
وعَايْشَاها رُوحنا
بَسّ مِش حّسّينها
وزَىّ المِرْاية
كُلّ يُوم فيها
بِنْشوف صُوَرْنا
وملامحنا تِسْأل
هىّ دى إحنا..؟
واللا
البّاقى من جروحنا..؟
،،،،
كتير..
كتير قوى
الحًبّ الوحيد فِ حَيْاتنا
واللي عُمْره ماسَابنا
ومن كُتره؛ خَايْف مِنّا
خَايْف يِلمْسنا
وبيتمرجّح فِ رُوحنا
بيمشي قُدّامنا
ولا عايز يِشُوفنا..؟
ولَمّا صُدفة يقابلنا
يِعْرف قدّ إيه خِسِرنا..؟
وفِ إيده كان
كان طِفل غِيِرنا..!
،،،،
كتير..
كتير قوي
بِنِبْعِد عَنْ اللي عاوزنا
ولمّا دايْماً عَليْنا
وورا حياتنا يِجْري
يِنْسى نفسه
مَايّه بمُوجَنا..!
ونِنْس إنّه غَصْب عَنّه
وعَشان خاطرنا
مُرّ طَعْمه لِسّه بشَفايفنا..!
وعَ الشطّ
بتجمّدنا وَقْفِتنا
مغرورين بشوق عايشنا
متخدّرين برمْلُه
اللي بيدغدغ خدودنا
ونداري فرحتنا
فرحة عايزاها روحنا
وهيّ مَرْسى قاربنا
ومَرْكِب شِراعنا..!
وييجي يوم
علشان نِحْلا
فِ عِين اللي مِشْ عايْزنا
نِصْرف كُلّ اللي فِ جيبنا..!
ولَمّا ينتهي لِيل زِفافنا
يكون دَبَحنا..!
،،،،
كتير..
كتير قوي
بنختار مِشْ حَيْاتنا..!
كتير..
كتير قوي
مِشْ حَيْاتنا بِتختارنا..!
......
