الجمال جمال الروح مش جمال الشكل، والروح هى الباقية فى قلوب أهل مصر وناسها الطيبين اللى لو قصدهم غريب فى حاجة مبيتاخروش.. فى حلقة جديدة من برنامج "فتحى شو"، تقديم محمد فتحى عبد الغفار، نسلط الضوء أقدم بائعة جرائد فى مصر وهى الحاجة كريمة التى تبلغ من العمر 90 عاما.
الحاجة كريمة لديها من الأبناء 7 توفى منهم أربعة، حيث تقول: "ولادى الأربعة ماتوا ورا بعض ودفنتهم بإيدى جنب بعض وحزنت عليهم حزن شديد جدا لأنهم كل حياتى، ودرمغت نفسى فى الأرض عليهم، والأفضل ليا إنى أشيل اللقمة من بقى وأديهالهم، حياتى كلها ليهم".
وتابعت: "جوزى مات من أكتر من 30 سنة كنت بحبه بس كان (بيتعتول) عليا ويضربني، بس كنت أصيلة وشيلته وصرفت عليه لما تعب وخدمته وهو تعبان 30 سنة مبيتحركش من مكانه، واشتغلت خدامة فى البيوت طول حياتى وببيع الجرايد".
وأردفت: "أنا عندى 90 سنة وشوفت السحلول نفسه اللى هى حكم الدنيا، شوفت الملك فاروق والرئيس جمال عبد الناصر والسادات ومبارك، الملك فاروق كان بيحطلنا الأكل فى الجنينة فى الدحدورة هنا، وكان بيدينا صابون علشان نستحمى بيه".
واستكملت: "أنا حجيت بيت ربنا فى ناس ودونى وحجيت، وكنت هروح السنة ديه كمان بس قالولى الكورونا مش هينفع تروحى وإن شاء الله الكورونا هتمشى قريب".
تم أضافة تعليقك سوف يظهر بعد المراجعة