بث تلفزيون اليوم السابع حوارا مع الدكتورة نانا زويل، شقيقة العالم المصرى الراحل الدكتور أحمد زويل، والتى تحدثت خلاله عن كثير من الجوانب الإنسانية للدكتور الراحل أحمد زويل، ومن بين هذه الجوانب أكلاته المفضلة وقالت " زويل كان بيحب الفول والفلافل، يعنى لما كان بينزل من بره ويجى مصر، أقوله نفسك تأكل إيه، يقولى انا بحب الفول والفلافل، أقوله ده كلام، ازاى الدكتور زويل رايح عند أخته أو مامته وجاى من بره وعايز يأكل فول وفلافل، يرد ويقول أنا شبعان زهقان من كل الأكل، لكن بحب الفول والفلافل، وفعلا كنت أبعت اجيب فول وفلافل من مكان معين ويقعد ياكل".
وتابعت نانا زويل، "كان حتى على المائدة كان متحدث، مكنش يقعد يأكل فى صمت لكن كان يقعد يتكلم ويفتح المواضيع واحنا على المائدة".
وقالت نانا زويل عن كل ما تردد بشأن ترشح زويل لرئاسة الجمهورية " زويل عمره ما فكر فى الموضوع ده، أن وقت ثورة يناير وصلت له إيميلات من مصر تطالبه انه يترشح، وفيه شخصيات عامة دون ذكر أسماء سافرتله أمريكا واتكلمت فى الفكرة ديه، والسوشيال ميديا وقتها كتبت كتير، هو كان عايز ينزل وقتها للشباب اللى بيحبهم واللى شايف فيهم الأمل، وسافر فعلا ورجع تانى أمريكا، لكنه تحدث وقال انه رجل علم وليس رجل سياسة".
