استمرار لتغطية تليفزيون اليوم السابع، لكافة فعاليات مهرجان الجونة السينمائى فى الفترة من 23 لـ 31 أكتوبر الجارى، التقت كاميرا تليفزيون اليوم السابع، مع الزميلة شروق وجدى بالمهندس عمر الحمامصى الرئيس التنفيذى والعضو المنتدب لشركة أوراسكوم للتنمية مصر، تصوير الزميل محمد شيتوس .
وفى بداية حديثه وعن صعوبات إقامة المهرجان قال الحمامصى: "الظروف كانت صعبة لكن احنا أصرينا بعد ما نسقنا عن قرب مع كل الجهات الحكومية خاصة وزارة الصحة انه نمشى فى المسار ده لأنه الحياة لازم تكمل والتفاؤل لازم يكمل ومينفعش نوقف المعيشة كلها والاقتصاد كله فتفاءلنا وفكرنا جامد واشتغلنا عن قرب مع جميع الجهات الحكومية لإقامة المهرجان السنادى."
وأضاف الحمامصى خلال اللقاء: "الوقت كان ضيق شوية لأن قرار التنفيذ جالنا قبل بداية المهرجان بـ 4 أسابيع.. لكن لأننا كنا بدأننا ننسق مع وزارة الصحة من قبلها.. واللى عملناه كان عدد كبير من الإجراءات أولها أن وزارة الصحة جاءت على الأرض للتأكد من كل الإجراءات التى يتم اتخاذها ومطابقتها للإجراءات اللى حطوها لينا، وبعدين جبنا شركة تانية تتأكد من الإجراءات الاحترازية "
وتابع: "رحنا كمان مهرجانين هما مهرجان فينيسيا ومهرجان سان سباستيان فى إسبانيا علشان نشوف هما بيعملوها ازاى واستفدنا جدا الصراحة.. وحددنا أماكن مفتوحة للافتتاح والختام مع الالتزام بالتباعد الاجتماعى "
وعن المظاهر المختلفة الجديدة فى مهرجان الجونة قال :" الفيستفال بلازا " هى مركز ثقافة واجتماعات وهى عبارة عن مساحة كبيرة جدا حواليها مياه وممكن نعمل فيها اللى احنا عايزينه، فاحنا فكرنا اننا نبنى سينما فى الهواء الطلق ودى حاجه بترجعلنا ذكريات قديمة فى اسكندرية.. ومساحة تسمحلنا إقامة مسابقات لرواد الاعمال أو ندوات أو نقاشات.. وعملنا مساحات مختلفة للشركات اللى شغاله "
وعن تغيير الإدارة وكواليس خوف الرعاة من كورونا، قال الحمامصى :" أولا موضوع تغيير الإدارة كان حاجه مهمة جدا بالنسبة لينا وبالنسبة للمهرجان ككل، احنا بنستضيف المهرجان من البداية منذ 4 سنين وما زلنا شغالين عن قرب مع فريق الإدارة التى كانت تدير المهرجان خلال الـ 3 سنوات الماضية، وبالنسبة لنا استمرارية المهرجان حاجه مهمة جدا، فا قررنا نتعمق أكثر فى الإدارة بطريقة تؤكد لنا أنه هنشوف مهرجان الجونة دايما خلال الفترة الجاية "
وعن الأفلام التى حازت على إعجابه قال الحمامصى أن فيلم شارلى شابلن هو أكثر ما أعجبه حتى الان بين العروض الكثيرة.
