أكدت الفنانة نهال عنبر، أن بعض "الحموات" تتدخل في حياة أبنائها بشكل فج، وتتحدث في أمور شخصية، وقالت: "في ستات بتتدخل في حياة جوز بنتها أكتر ما بتتدخل في حياة بنتها، زي ما مثلا ما تسألهم انتوا ليه جايبين طفل واحد بس، أو ليه جايبين عدد أولاد كبير، فبقى تدخل في حاجات تخص الأزواج وحياتهم الخاصة فقط، زي ابني مثلا هو عنده ولدين، هل لو جاب التالت أقوله ليه؟ ما براحته أنا مالي".
من جانبها، قالت الإعلامية شيرى، خلال برنامج "راجل و2 ستات"، الذى يذاع على قناة "ON E": "أنا دايما بحس أن ملف الخلفة ده ملف كدة مش متخطط له تماما، إزاي قرار مهم زي ده، وكيان جديد بينضم في حياتك، وهيأثر على حياتك الشخصية زي المصاريف والشغل، ميكونش متخطط له، ولا في بال حد أنه يخطط للموضوع ده باعتباره أمر محوري ومصيري في حياته".
وأضافت: "هتكلم مع جوزي بيني وبينه وأقوله لو في خبر سعيد بيني وبينك هنبلغ ماما وطنط، علشان دخول أي حد في الموضوع ده دلوقتي ممكن يسبب مشاكل، وأنا لو شوفته شخصيته ضعيفة هعرف في مرحلة الخطوبة أكيد، وهيكون في مؤشرات أن الجوازة دي هتفشل لأنه هيبقى واضح أن ماما طرف ثالث في العلاقة".
