استطاعت السوبرانو، أميرة سليم، بغنائها لأنشودة إيزيس بحفل موكب نقل المومياوات الملكية، أن تخطف آذان كل من سمعها، وتصحبه معها لعصر من عصور الفراعنة وتجعله يراها تغنى بأحد المعابد بفستانها المستوحى من الملابس الفرعونية، وهذا ماشعر به باسل القاضى، الذى رسم أميرة كمغنية تنشد بحماس بأحد المعابد الفرعونية، ولقت الرسمة إعجاب الكثيرين منهم أميرة سليم التى نشرتها على صفحتها الخاصة بموقع "الفيس بوك".
أميرة سليم
ولم تكن لوحة أميرة سليم، هى اللوحة المستوحاة من الفراعنة الوحيدة لباسل، الذى اعتاد بين الحين والأخر رسم بعض الشخصيات الفرعونية الخيالية بالزى الفرعونى المعروف، وقد تحدث باسل عن رحلته مع الرسم وحبه للرسم الفرعونى، حيث قال لـ" اليوم السابع"، :" طول عمري بحب الرسم، لكن قررت أحترفه من حوالي 6 سنين، وبدأت أعلم نفسي من فيديوهات اليوتيوب، وبدأت اقوي نفسي أكتر عن طريق كورسات من رسامين من ديزني زي Aaron Blaise و Nathan Fowkes".
أضاف "رسمت اكتر من 8 كتب أطفال لكن للأسف مش في مصر أو الوطن العربي، شغلي معظمه مع كتّاب كتب الأطفال الأمريكان، وكمان اشتغلت مصمم للشخصيات، لكن طول عمري كان نفسي إني أكون عايش في زمن المصريين القدماء و ده سبب رسوماتي الكتيرة المتأثرة بيهم، و من أكبر أمنياتي إني أصمم شخصيات لفيلم كرتون بتدور أحداثه في زمن مصر القديمة، أو إني اشتغل على سلسلة من كتب الأطفال تتكلم عن تاريخنا الفرعوني، علشان ولادنا يتعرفوا على تاريخنا و يكونوا دايماً فخورين بيه".
إحدى الرسومات
إحدى رسومات باسل
وأضاف باسل خريج كلية الهندسة جامعة عين شمس و الحاصل على الدكتوراه في الهندسة المدنية، قائلاً :"تفاعل الناس على السوشيال ميديا مع رسوماتي و خصوصاً رسوماتي المتأثرة بالمصريين القدماء، بيفرحني جداً علشان معظم متابعيني عندهم نفس إحساسي بالفخر بتاريخنا و ده اللي بحاول اوضحه في الرسومات".
رسمة لباسل
وعن سر رسمه للوحة فنية للسوبرانو، أميرة سليم، قال :"موكب المومياوات الملكية يوم عمري ما أنساه، لأنه فكرنا كلنا بهويتنا و ثقافتنا الحقيقة و كنت فخور جداً أن العالم كله قدر يشوفوه، و إن شاء الله متأكد أننا هنشوف عروض زي كده كتير قدام، والجزء اللي غنت فيه أميرة سليم من أكتر الأجزاء اللى حبيتها فى العرض الفنى، لأنى لأول مره أسمع لغتنا القديمة و كمان أداء أميرة سليم مع الموسيقى الرائعة كانت تجربة عمرها ماتتنسي، و لسه بسمع الجزء ده أكتر من مره كل يوم و أنا برسم ".
رسمة أخرى
يواجه باسل بعض الصعوبات فى مهنته الفنية، والتى عبر عنها قائلاً :"الصعوبات اللى بقابلها فى شغلي أن للأسف في السنين اللي فاتت مفيش تقدير كبير للرسامين و المجهود الكبير و الوقت اللي بنبذله في شغلنا، لكن الفترة دي الناس بقى عندها وعي بالفن و متأكد إن شاء الله إننا كفنانين مصريين هنوصل للتقدير اللي نستحقه".
لوحة فنية لباسل
وختم باسل حديثه معبراً عن حلمه، قائلاً :"بحلم أن عدد الرسامين المصريين يزيد أكتر عشان إحنا من أوائل الشعوب اللي علمت الناس الرسم، وده سبب إني عملت قناة على اليوتيوب بحاول إني أعلم الناس فيها كل حاجه أتعلمتها، و متأكد أننا نقدر نرجع نكون الأحسن في المجال ده".
نفرتيتى
